កំពង់ធំ: បេក្ខភាពមេឃុំជាប់ឆ្នោតបក្សភ្លើងទៀន នៅឃុំចំណារលើ ស្រុកស្ទោង ខេត្តកំពង់ធំ លោក ញឹម សារ៉ុម ត្រូវបានតុលាការអនុញ្ញាតឲ្យនៅក្រៅឃុំវិញ បន្ទាប់ពីបើកសវនាការនៅថ្ងៃពុធ ទី២២ ខែមិថុនានេះ។
អយ្យការសាលាដំបូងខេត្តកំពង់ធំ បានឲ្យដឹងថា លោក ញឹម សារ៉ុម ភេទប្រុស អាយុ ៥២ឆ្នាំ នៅក្រៅឃុំជាបណ្ដោះអាសន្នបន្ទាប់ពីបានបើកសវនាការជាសាធារណៈដើម្បីជំនុំជម្រះមុនអង្គសេចក្តីលើការស្នើសុំនៅក្រៅឃុំជាបណ្ដោះអាសន្នរបស់លោក។
លោក ញឹម សារ៉ុម បានដាក់ពាក្យសុំនៅក្រៅឃុំទៅអយ្យការខេត្តកំពង់ធំ សុំប្តឹងទាស់នឹងសាលក្រមកំបាំងមុខលេខ០៧ “ង” ចុះថ្ងៃទី២១ ខែកក្កដា ឆ្នាំ២០១៤ របស់សាលាដំបូងខេត្តកំពង់ធំ និងស្នើសុំនៅក្រៅឃុំជាបណ្ដោះអាសន្នកាលពីថ្ងៃទី២១ ខែមិថុនា ម្សិលមិញ។
គួរឲ្យដឹងផងដែរថា លោក ញឹម សារ៉ុម ត្រូវបានសមត្ថកិច្ចចាប់ខ្លួនតាមអំណាចសាលក្រមកំបាំងមុខចុះថ្ងៃទី២១ ខែមិថុនា ឆ្នាំ២០១២ របស់សាលាដំបូងខេត្តកំពង់ធំ ដែលផ្តន្ទាទោសឲ្យលោកជាប់ពន្ធនាគារពាក់ព័ន្នឹងបទប្លន់៕